Mánájgárdde galggá guládallamav ja gielav åvdedit
Mánájgárdde galggá liehket diedulasj jut guládallam ja giella vájkkut ja vájkkuduvvá juohkkat bieles mánáj åvddånahtedijn. Dialåvgå ja avtastallama baktu galggi máná hasoduvvat guládalátjit, aktan dåjmatjit, gulldalittjat, dádjadittjat ja ájádusájt hábbmitjit. Mánájgárdde galggá dåhkkidit ja árvvon adnet mánáj moattelágásj giella ja guládallamvuogijt, sevvamgiellaj aj. Divna máná galggi oadtjot buorre giellaarvusmahttemav bæjválattjat mánájgárden, ja divna máná galggi bessat oassálasstet dåjmajda ma guládallamav ja ålles giellaåvddånimev åvdedi. Mánájgárdijn sáme mánájda sáme guovlojn galggá mánájgárdde mánáj sámegielak máhtudagáv åvdedit.
Bargge galggi
- dåhkkidit ja responderit mánáj moattelágásj verbála ja verbáladis moalgedimijt ja sijá giellaåvddånimev doarjjot
- arvusmahttet mánáj verbála ja verbáladis guládallamav ja viehkedit vaj divna máná sehkani avtastallamij ja ságastallamijda
- bærrájgæhttjat vaj divna máná oadtju målsudahkes ja buorre åtsådallamijt gå gielav adni guládallamnævvon, ræjddon ájádallamijda, ja ietjasa ájádusájda ja dåbdojda
- liehket diedulattja ietjasa roallaj giellaåvddågåvvån ja liehket gullisa gå guládi divna mánáj
- gåtsedit mánáj guládallamav ja gielav ja ájttsat ja oatsodit mánájt gejn li duo dá guládallamváttesvuoda, gudi binnáv ságasti, jali maŋŋet ságastahtji
- viehkedit vaj gielalasj moattevuohta sjaddá boanndudahkan ålles mánájjuohkusij, oatsodit moattegielak mánájt anátjit iednegielas ja sæmmi båttå åvdedit ja åvddånahttet mánáj dáro-/sámegiela máhtudagáv
Guládallam, giella ja tæksta
Fáhkasuorge bargadijn galggá mánájgárdde viehkedit mánájt vaj bessi guoradallat ja åvddånahttet ietjasa gielladádjadusáv, giellamáhtudagáv ja guládallamhámij moattevuodav. Mánájgárden galggi máná dejvadit duojna dájna gielajn, giellahámijn ja dialevtajn rijmaj, gáritjisáj, lávllagij, girjálasjvuoda ja tevstaj baktu, ietjas ájges ja åvdep ájges. Mánájgárdde galggá viehkedit vaj máná ståhki gielajn, symbåvlåj ja tevstaj ja arvusmahttet gielalasj njunjágahttemij diedulasjvuohtaj ja åvddånibmáj. Mánájgárden galggi máná oadtjot máhttelisvuodav åtsådallat duov dáv åvddånbuktemvuogev tevstajs ja subttsasijs, gálldon estetalasj muossádibmáj, máhttuj, refleksjåvnnåj ja gielaj ja kultuvraj æjvvalibmáj. Bargge galggi hásstet mánájt njálmálasj gielav ja tjállemgielav guoradalátjit.
Gå li barggamin guládallamijn, gielajn ja tevstaj galggá mánájgárdde viehkedit vaj máná
- åvddånbukti dåbdojdisájt, ájádusájt, vuojnojt, ja åtsådallamijt moatte láhkáj
- adni gielav relasjåvnåjt dagátjit, oassálastátjit ståhkamijn ja ræjddon rijdojt tjoavdátjit
- åvddånahtti ietjasa báhkodádjadusáv ja adni målsudahkes báhkoboanndudagáv
- ståhki, improviseriji ja gæhttjaladdi rimaj, rytmaj, jienaj ja bágoj
- dejvadi måttijn subttsasijn, båvaj ja åvddånbuktemvuogij
- åtsådalli geldulasjvuodav ja ávov jieddnáslågådijn, subttsasij, lávllagij ja ságastallamij baktu
- guoradalli ja åmasti åtsådallamijt duojna dájna tjállemgiella åvddånbuktemijn, degu ståhkama, tjállema, sárggoma ja bokstáva, ja låhkåm- ja tjállemdåjmaj baktu
Bargge galggi
- dahkat målsudahkes giellabirrasav gånnå máná bessi åtsådallat ávov giellaadnema baktu ja gå guládalli iehtjádij
- tjalmostit gielalasj ja kultuvralasj moattevuodav, doarjjot mánáj moattelágásj åvddånbuktemijt ja identitiehtav ja åvdedit moattevuodav guládaládijn, gielajn ja ietjá åvddånbuktemvuogij
- hásstet duon dán ságastallamij gånnå máná bessi subtsastit, imájdallat, ájádallat ja gatjádallat
- bádtjit mánájt gåvådalátjit ja gielajn stågatjit, ja jienaj, rijmaj ja rytmaj
- måvtåstuhttet mánáj ståhkamav ja guoradallamav tjállemgielas
- adnet målsudahkes åvddånbuktemvuogijt ja fállat valjev girjijs, lávllagijs, gåvåjs ja åvddånbuktemvuogijs
- sebrudahttet divna mánájt giellaarvustahttem dåjmajda